(၁)နာရီကျော်ကြာ မီး‌လောင်မှုဖြစ်ပွားခဲ့သည့် ထိန်ပင်အမှိုက်ပုံမီးလောင်မှုဖြစ်စဥ်တွင် မီးသတ်တပ်ဖွဲ့ဝင်တစ်ဦး ထိခိုက်ဒဏ်ရာရရှိခဲ့ကြောင်း သတင်းရရှိသည်။

ဖြစ်စဥ်မှာ ယနေ့(ဇွန်လ ၂၂ ရက်)၊ နံနက်(၁ဝ)နာရီ (၄၅)မိနစ်အချိန်တွင် လှိုင်သာယာမြို့နယ်ရှိ ထိန်ပင်အမှိုက်ပုံ၌ ဖြစ်ပွားခဲ့ကြောင်း ကူညီကယ်ဆယ်ရေးလုပ်ငန်းဆောင်ရွက်ပေးခဲ့သည့် လူမှုကူညီရေးအသင်း ဝင်တစ်ဦးမှ ဆိုသည်။

အဆိုပါဖြစ်စဥ်မှာ တွဲကားပေါ်ရှိ စွန့်ပစ်ဓာတုပစ္စည်းများကို ဘတ်ဟိုးဖြင့် အောက်သို့ချရာမှ ပွတ်တိုက်မှုဖြစ်ကာ မီးလောင်မှုစတင်ဖြစ်ပွားခဲ့ကြောင်း သိရသည်။

“အဲဒီအမှိုက်ပုံမှာက ဓာတုစွန့်ပစ်ပစ္စည်းတွေထားတဲ့နေရာရှိတယ်လေ။ တွဲကားက အဲဒီပစ္စည်းတွေကို လာချတာ ဘတ်ဟိုးက အောက်ကိုချပေးရင်းနဲ့ပွတ်တိုက်မိတော့ မီးပွားတွေဖြစ်လာတာ။ ပြီးတော့ မီးပွားတွေကပျံ့ကုန်တော့ ဓာတုပစ္စည်းတွေကနေ မီးလောင်မှု ဖြစ်တာပါ”ဟု အထက်ပါသတင်းအရင်းအမြစ်က NP News ကိုဆိုသည်။

အဆိုပါ မီးလောင်မှုဖြစ်စဥ်ကို level-2 အဆင့်သတ်မှတ်ခဲ့ပြီး မီးငြှိမ်းသတ်နေသူများအနက်မှ မီးသတ်တပ်ဖွဲ့ဝင်တစ်ဦး ထိခိုက်ဒဏ်ရာရရှိခဲ့ကြောင်း သိရသည်။

“တခြားထိခိုက်တဲ့သူတော့မရှိဘူး။ ‌ရှေ့တန်းမှာမီးငြှိမ်းသတ်တဲ့ မီးသတ်သမားတစ်ယောက်ကတော့ မီးဟပ်သွားတယ်လို့ကြားတယ်။ ဘယ်စခန်းကလဲတော့ စုံစမ်းနေတုန်းပဲ”ဟု ၎င်းက ဆက်လက်ပြောဆိုထားသည်။

မီးလောင်မှုဖြစ်စဥ်ကြောင့် ဘတ်ဟိုး(၂)စီး အပါအဝင် တွဲကားတစ်စီး ပျက်စီးဆုံးရှုံးခဲ့ပြီး နေ့လည် (၁၂)နာရီ (၁၅)မိနစ် အချိန်ခန့်တွင် မီးငြှိမ်းသတ်နိုင်ခဲ့ကြောင်း သိရသည်။